العناية بالورد الطبيعي في 5 خطوات سهلة وبسيطة لورد فريش فترة طويلة

بوكيه الورد الطبيعي من أجمل الهدايا اللي بتتقدم من اللي بيحبونا وبنحبهم. واللي بيخلينا دايماً مهتمين بالعناية بالورد الطبيعي ونحافظ عليه ونفضل شايفينه قدامنا بيضيف لمسة جميلة كلها حب حوالينا.

كل بوكيه ورد بيجيلك هدية بتيجي معاه حيرة ازاي تحافظي عليه لأطول فترة. علشان كدا هنجاوبك النهاردة بأفضل وأسهل طريقة تضمن الورد فريش لأطول مدة. وعلشان نعرف السر لطريقة فعالة، مهم نعرف ايه الحاجات اللي بتفرق في الاهتمام بالورد قبل ما يوصلنا. 

الخطوة الأولى: التغليف والعناية بالورد الطبيعي

التغليف مهم جداٌ في العناية بالورد. ضروري يحافظ عليه من الحرارة أو البرد وكل العوامل الخارجية اللي بيتعرضلها أثناء نقله من محل الورد للبيت. وده بيخلينا دايماً بنختار ما بين أفضل خامات وأشكال البوكس أو بوكيه اليد علشان نقدم لك أحسن اهتمام.

الخطوة الثانية: التقصيف والعناية بالورد الطبيعي

علشان تتجنبي أضرار وجود فقاعات الهوا والبكتيريا في الجذور واللي بتسب الذبلان. اقطعي 3 سم من الجذور ومهم يكون القطع بزاوية. ده بيخلي جذور الورد تتشبع أكتر بالماية اللي بتغذيها ويخرج الهوا والبكتيريا اللي بيضروها.ولأن الماية لو وصلت لأوراق الورد هتسرع إنه يدبل، اقطعي أي ورق في الجذور. ويفضل استخدام سكينة مش مقص. خلي بالك فى أنواع زهور زي التوليب الأفضل ليها هو القطع بشكل مستقيم. دايماً استعيني بمساعدة محل الورد في طريقة العناية بالورد. تقدري تعملي ده كل يومين لتلاتة لأفضل نتيجة.

الخطوة الثالثة: الماء والعناية بالورد الطبيعي

الجفاف هو العدو الأول للورد الطبيعي. دايماً خلي الورد مترطب وفي الماية من أول خروجه من البوكيه.  تجنبي البرودة أو السخونة الزايدة، خلي دايماً الماية نفس درجة حرارة الغرفة علشان تحافظي على الورد لأكتر فنرة ممكنة. طبعاً ضروري الماية تكون خالية من البكتيريا، استخدمي ماية مفلترة. واظبي على تغيير الماية كل يوم ليومين لتجنب الذبلان. برضو في أنواع ورد بتفضل الماية الباردة، اسألي محل الورد لتفاصيل أكتر.نقدر نقسم كمية الماية المناسبة في العناية بالورد الطبيعي لنقطتين:

 النوع الأول: ورود جذورها صلبة

الجذور الصلبة بتحتاج كمية ماية أكتر، زي الورد الأحمر مثلاً. املي ⅔ الزهرية ماية علشان تكون كافية لتغذية وترطيب الجذور والحفاظ على الورد الطبيعي.

النوع التاني: ورود جذورها لينة

على عكس الجذور الصلبة الجذور اللينة بتحتاج كمية ماية أقل.زي ورد الليليز والتوليب. كل اللي محتاجاه تملي نص الزهرية ماية هتكون كفاية جداً للحفاظ على الورد فريش.

الخطوة الرابعة: مكان الزهرية والعناية بالورد الطبيعي

تجنبي الحرارة القوية على الورد. خلي دايماً الزهرية بعيدة عن أشعة الشمس المباشرة أو فتحة التكييف. درجة الحرارة الأبرد دايماً أفضل للورد الطبيعي. لكن في نفس الوقت مكان يقدر الورد يتنفس فيه ويحافظ على رونقه. في اختيار الزهرية نفسها اختاري زهرية تكون مناسبة لحجم الورد في البوكيه علشان ما يضغطش بعضه. 

الخطوة الخامسة: المغذيات والعناية بالورد الطبيعي

المغذيات أو المواد الحافظة التي بتيجي مع بوكيه الورد أو ممكن اطلبها من محل الورد هي أفضل نوع. ضيفيها للماية في المزهرية وقلبيها قبل ما تضيفي الورد. 

الخمس خطوات دي هتساعدك تحافظي على الورد الطبيعي فريش لأطول فترة. احتفظي بالذكريات الجميلة وجددي حبكم كل يوم. 

الاهتمام بالورد فرصة تفصلي عن دوشة الحيارة اليومية وتتواصلي مع الطبيعة في هدوء كل يوم لوقت مهما كان صغير لكن أكيد هيغير يومك.

تابعينا على فيسبوك وانستجرام لكل ما يخص العناية بالورد الطبيعي والتوصيل اونلاين في مصر والجيزة.